I muess geng lache, we sii meine, wäg ere frömde Schpraach gönge üsi Dialäkte unger. Die Iiflüss hets scho geng ggäh, Schprach isch ja öppis Läbigs, d Walliser säge «sumi» u hei äuä scho lang vergässe, dass das vom änglische «some» chunnt, mir Bärner säge em Brünneli «Lavabo» u em Wöschhudu «Lavettli», das chunnt vom Franzos, u wäge däm isch d Wäut nid ungerggange. U dass d Secondos unger de Jugendleche chli dr Ton aagäh, isch o grad nüt Nöis.

Hütt rede halt jetz all chli wie dr Bendrit, u mir hei doch sinerzyt all gredt wie dr Gianluca vo Bümpliz. He! Dä isch dr geilscht Siech gsy u hett alli Froue abzügelt, mir hei doch all wöue sy wie dä, hei es Kilo Scheel id Haar gschmiert, sy uf Mailand ache ga «Jesus-Jeans» choufe, hei ds Puch-Maxi gäge nes Ciao tuuschet, Lucio Dalla glost u Italosläng gredt. «Sai, i schutte bim Äffcee Azzurri, also, Ussebäck, diciamo: terzino destro, wüu Zio Alberto isch Treener›, het er albe gsei …»

Jetz hett sich halt uf de Pouseplätz chli dä Jugo-Slang düregsetzt, u wenn i uf de Schuttplätz im Limmattal gah go lose, dominiert dä no geng, ‹monn›! Aber vilech halb im Witz, das isch öppis Schpilerisches, u die meischte Ching, miner eigete oo, chöi dänk scho richtig rede, wes drufaa chunnt. Ime Bewärbigsgchspräch seit niemer em Lehrmeischter «Ey, Hirnamputiertä, bisch Opfr, odrwass»?

S git ke «falschi» Mundart, wüu gseit isch äbe gseit. Won i vor drü Jahr mit mim Programm «Gömmer Starbucks?» ha aagfange u überall im Tram u vorem Starbucks de Junge ha zuegglost, isch «OMG!» u «Yolo» no ganz nöi gsy, jetz sy s uralti Hüet. Emojis hets no chuum ggäh. D Entwicklig isch rasant, das fägt! Mi het e Moderator bi Radio 105 als «monogam» bezeichnet, u das het doch nüt angersch gheisse weder: I syg uralt!

«Tii Emm Äii», hani o gärn. We mi Tochter e Schissdräck ir Zytig liest, wo se nid inträssiert, knallt sii dr «Chinderblick», also das Blettli dahie, wo dir grad ir Hang heit, i ds Altpapier u seit nume «Tii Emm Äii», sprich: Too much information, mir heis nid wöue wüsse, mit welem Bätscheler-Löu d Winiger grad wider es Gschleipf het. Churz u schnurz sy sii, die Junge, u schnäu entschlosse – das gfaut mer.

De Bänz Friedli isch Kolumnischt und Kabarettischt. Am 9. Juni isch d Buechvernissasch vo sine Huusmaa-Kolumne (www.kaufleuten.ch/event/baenz-friedli)